По 9 години од опожарувањето започна првата фаза од изградбата на новиот Дом на културата во селото Куклиш. Во оваа прва фаза ќе се изврши рушење на градбата од стариот дом и изградба во карабина фаза на новиот дом.
Градоначалникот Костадин Костадинов со соработниците, претседателот на Советот, Марјан Даскаловскии и советници, денеска беа на лице место за да видат како се одвиваат градежните активности.
„Изградбата на новиот Дом е на барање на жителите на Куклиш, а иницијативата дојде од нашите двајца советници Ване Крстев и Наташа Шапковска кои правилно го канализираа како потреба од граѓаните да биде соодветно евидентирано во буџетот и нешто што постојано го нотирам, а тоа е соработката меѓу локалната и централната власт која навистина ги олеснува и постапките и процедурите и што е најважно во ова кризно време, а тоа се финансиите кои се заеднички и изнесуваат 7 милиони денари. Станува збор за нов модерен објект, кога градиме нешто ново треба да оставиме печат на нашето време. Сите луѓе оставаат печат во нивните мандати и мислам дека и јас и советниците од населеното место Куклиш треба да оставиме печат од нашиот мандат со нешто ново и модерно какво што заслужуваат жителите од ова населено место“ – кажа градоначалникот Костадинов.
Според проектната програма во Домот на културата се предвидени: сала за приредби и претстави со сцена и гардероби за изведувачи, влезен ходник со пристапни скали, библиотека со читална, две простории за културно уметнички друштва, две канцеларии за вработените, клуб на пензионери, канцеларија на Месната заедница, кафетерија, санитарни простории и просторија за сместување на термотехнички инсталации.
Изградбата на изгорениот и уништен објект на Домот на културата во Куклиш во првата фаза се финансира во сооднос 50% – 50% на Министерството за локална самоуправа и Општина Струмица од буџетите за ова 2022 година.
