![almak](https://strumicanet.com/wp-content/uploads/2025/04/srnet-banner-sofa-bed-garnituri-2025-optimized.jpg")
Во издание на Издавачката куќа „Макавеј“ во Центарот за култура во Струмица пред голем број љубители на поезијата беше промовирана книгата – стихозбирка „Аџилак“ на Ирена Бабамова Стојчева.
Оваа нова поетска обзнана на талентираната поетеса го продолжува успешниот залет започнат со претходните поетски објави од 90-тите години: „Крик во тишината” (1994) и „Сага за ветената земја” (1997), со кои го најави својот заслужен пат кон квалитетното поприште на современата македонска поезија.
„Со оваа книга Ирена Бабамова Стојчева по повеќе од две децении го воскреснува успешниот залет од претходните книги, и најавува лирска бура во рамките на краткиот простор на лирската песна. И токму сега со оваа стихозбирка воспоставува лирски мост изграден од пластови време и пластови имагинација. Одново во просторот на лирското возгласување на вистината, за себе си, за националното колективно опстојување и за светот воопшто, таков каков што денес го доживуваме и преживуваме, со вртлози, неизвесности и со безнадежност“ – кажа рецензентот на „Аџилак“, литературниот критичар Бранко Цветкоски.
„Внесувајќи квалитетна новина во своето сé уште по обем скромно поетско творештво, авторката суеверно раскажува дека по толку години молк на поетската сцена изградила сопствен и веќе добро нијансиран профил и дека е дојдено времето, нејзината идна активност на поприштето на современата македонска поезија да биде обележана со нови успеси кои Ирена Бабамова Стојчева ќе ја внесат во плејадата перспективни поетеси на нашата книжевност. Со овој нејзин поетски аџилак, Ирена потврди дека го заслужува тоа. Јас ќе продолжам да и верувам и да ја поддржувам“ – додаде Цветкоски.
Говорејќи за книгата „Аџилак“, промоторот Ацо Гогов вели дека во песните на Ирена постои една потрага по тоа што е свето и сé уште е свето во нас самите.
„Постои потрага по чистотата длабоко во нас. Тоа е навестено уште во првата песна од книгата, со наслов „Молитва“ која е обраќање до Бога во намерата да се проговори преку песната за нашето сопостоење, соништожноста, сопрашината“ – кажа Гогов.
Освен што модераторот Ѓорги Калајџиев и авторката Ирена Бабамова Стојчева читаа дел од поезијата во „Аџилак“, на почетокот од промоцијата беше прикажан и видео запис со стихови од книгата направен од Столе Ангелов, специјално за оваа промоција.
Ирена Бабамова Стојчева е родена на 28 февруари 1979 година во Струмица. Со високо образование се стекнува на Правниот факултет Скопје, по што продолжила да се развива работејќи на програми на ЕУ за прекугранична соработка. Во 2007 година ја добива прва награда за литературна творба во рамките на годишната награда „Свети Петнаесет Тивериополски свештеномаченици” на градот Струмица.
