Од вчера почна новогодишното украсување на плоштадот во Струмица и годинава скромно колку да се почуствува духот на празниците. Нема да се украсува целиот град, како што беше пракса во минатото, годинава како и лани ќе биде украсен само плоштадот „Гоце Делчев“.
Од буџетот за украсувањето планирано е да се потрошат 400.000 денари, а во новогодишното украсување ќе се вклучат и неколку приватни компании кои веќе пројавиле интерес дополнително да помогнат во збогатувањето на празничната атмосфера.
За украсувањето нема да биде ангажирана посебна фирма, туку тоа ќе се реализира преку општинското Јавно претпријатие „Паркиралишта Струмица“.
Градоначалникот Костадин Костадинов најавува дека во делот на осветлувањето ќе бидат запазени сите препораки за штедење на електричната енергија.
