Почна Балканското првенство во одбојка за играчи до 22 години во струмичко Ново Село

Вечерва во Ново Село беше отворено Балканското првенство во одбојка на песок за играчи до 22 години за мажи и жени. Организатор е Одбојкарската Федерација на Македонија во соработка со Општина Ново Село, а на терените на спортскиот центар „Мануш Турновски“ се очекува да има атрактивни натпревари со учество на некои од најталентираните одбојкари и одбојкарки во овој спорт во регионот.

„Одбојката на песок е се поразвиен спорт со застапеност и на Олимпијадите. Ние секоја година се обидуваме да ја збогатиме нашата активност со организација на вакви турнири во рамки на Балканската одбојкарска асоцијација, а на тој начин да им овозможиме не само на љубителите на одбојката, туку и на сите спортски вљубеници да се запознаат со одбојката на песок. Тоа е еден начин да се поминат летните горештини со спортско-забавни содржини“, истакна генералниот секретар на Одбојкарската Федерација на Македонија, Зоран Карановиќ.

На Балканското првенство во Ново Село кое се одржува од 9 до 11 август учествуваат девет машки и пет женски двојки од седум земји: Турција, Молдавија, Грција, Косово, Босна и Херцеговина, Романија и Македонија, а нашата земја ќе ја претставуваат Кристијан Илијев и Филип Јованов во едната, како и Никола Георгиев и Филип Петрушевски во другата машка двојка, а кај дамите Симона Наковска и Стефанија Кипријановска.

Денеска беше и првиот натпреварувачки ден со групните натпревари, а утре, сабота исто така е планирано разигрувањето по групи, додека во недела елиминациската фаза.

Балканско првенство во одбојка на песок (играчи родени 2003 и подоцна)

Групна фаза (09.08.2024 петок, 09:00 – 22:30 часот)

Групна фаза (10.08.2024, сабота, 09:00 – 22:30 часот)

Четвртфинале (11.08.2024, недела, 08:30 – 12:30 часот)

Полуфинале, натпревар за бронза и финале (11.08.2024, недела, 16:30 – 20:30 часот)