Почина ликовниот уметник од Струмица – Георги Божинов Фаника

Денеска во Скопје на 77-годишна возраст почина Георги Божинов – Фаника, познат македонски академски ликовен уметник – сликар. Роден е на 25 август 1947 година во Струмица.

Педагошка академија завршил 1972 година во Скопје. Член е на ДЛУМ и ДСЛУ. Живеел и работел во Скопје, Дојран, Охрид, Словенија. Во Словенија работел како професор и предавал ликовна уметност во средно образование.

Најпознати мотиви во делата на Георги Божинов – Фаника се пејзажи и глетки од Македонија пресликани во многу слики со македонски села, полиња, охридските цркви и манастири, Охридското езеро и стариот град, а има нацртано и доста портрети. Во своето сликарско творештво има повеќе циклуси по кои е доста познат, меѓу кои „Корени“, „Дојран“, „Жени“. Сликал и повеќе портрети на личности.

Учествувал на повеќе сликарски колонии, меѓу кои: Струмица, Почитељ, Куманово, Врање, Костањевица на Крка, Скопје, Велес, Ниш. Негови дела има во галерии во: Врање, Белград, Подгорица, Тузла, Почитељ, Струмица, Метлика, Сликарска работилница „Дојран“ и други места. Организирал повеќе самостојни изложби во Струмица, Скопје, Велес, Србија и Словенија. Неколку години по ред бил главен организатор на ликовната сликарска колонија во Дојран. Негови дела се наоѓаат во приватни колекции, како во Македонија, така и во странство.

Божинов ќе биде погребан утре (вторник, 13 февруари) во 12:00 часот на Градските гробишта во Струмица.