![almak](https://strumicanet.com/wp-content/uploads/2025/08/srnet-banner-аugust2025-optimized.jpg")
Чувството дека помагаш и даваш поддршка не прави големи луѓе, а струмичани покажаа дека се уште во себе ја имаат големината во дарувањето, тие секогаш се тука да помогнат на секој, а посебно кога се работи за детски живот.
Поттикнати од Фондацијата „Елеуса“ од Струмица синоќа во Центарот за култура „Антон Панов“ струмичани ја наполнија салата за да го проследат првиот хуманитарен концерт на оваа фондација – „Звукот на човечноста“.
Со купената влезница од 300 денари, но и со донирање во поставените кутии пред влезот на салата се собираа пари за помош на 4-годишната Теодосија Лазаревска од Куманово, која се бори со тешка болест wilms тумор, а која по онколошкиот третман и операција малата Теодосија следната недела мора да го продолжи своето лекување во странство за што се потребни околу 50.000 евра.
Струмичани со чувството на хуманоста уживаа во прекрасната музичка содржина на концертот која ја создадоа исклучиво млади луѓе, аматери, но со силна желба да помогнат на малата Теодосија. Настапија вокално-иструменталниот состав „Стихири“, кој со својата музика и вокални изведби ја изненадија публика за што добија громогласни аплаузи. Тука беа веќе докажаните „музичари“, струмичките ѕвезди, солисти, хористи и инструменталисти од СОУ „Јане Сандански“. На сцената се појавија и нови „музичари“ од средните училишта „Никола Карев“ и „Димитар Влахов“, а вистинска музичка бајка беа младите „професионалци“, учениците од основното музичко училиште „Боро Џони“ од Струмица.
Хуманоста за да и се помогне на Теодосија Лазраевска продолжува и по концертот. Нејзината наменска сметка број: 210-5017330771-27 во НЛБ Банка е отворена, како и телефонскиот број за донација: 143-470 за претплатниците на А1 Македонија.
