„Тој беше несомнено дел од животот на секој струмичанец. Тој каде и да одеше, најсреќен беше дома во Струмица меѓу своите струмичани. Затоа мои сограѓани и гости бидете сите живи и здрави, благословени и долги години нека ве веселат песните на Гоце“ – кажа во своето емотивно обраќање сопругата на Гоце Арнаудов, Силвија која ја прими наградата за животно дело на Општина Струмица, годинава за легендата на македонската песна. Заблагодарувајќи се и честитајќи го празникот на градот, Силвија кажа Светите Петнаесет Тивериополски свештеномаченици да ни бидат пример, да се сакаме и да се држиме до Христовата вера.
На свечената седница на Советот на општина Струмица, која се одржа во Центарот за култура „Антон Панов“, покрај Наградата за животно дело на Гоце, беа доделени и седум Годишни награди на граѓани и компанија кои во изминатата 2024 година придонеле за афирмирање на Струмица, дома и во странство.
Годишна награда за струмичанката Љупка Вртева, која живее и работи во Љубљана, а во јануари Словенија ја прогласи за „Жена инженер за 2023“ година. Награда и за актерот во пензија, Томе Ментинов, за ресторан „Бонита“ кој годинава го слави својот 30-годишен јубилеј, за девојката на клавир која ја претставува Струмица насекаде низ светот со своите настапи Ивана Мазнејкова, за долгогодишниот крводарител Тимо Комаров, за професорот Иван Козарев и за младиот „амабасадор“ на Струмица кој со своите музички настапи како инструменталист и солист ја носи Струмица со себе насекаде низ Европа.
На свеченоста, Општина Струмица на Марија Рашковска, проектен соработник на Државното средно училиште РЦСОО „Никола Карев“ од Струмица и додели посебно Признание за остварување во интернационализацијата на образованието и одржливи практики.
