Поезијата во филм – „Куќа на ѕвездите“ за семејството на поетот Иван Василевски на Преведена

Поетска приказна во филм – „Куќа на ѕвездите“ беше обзнанена синоќа во пресрет на празникот Светите Петнаесет Тивериополски свештеномаченици, сведоштво за животот на семејството на поетот Иван Василевски создадено на Преведена.

Кога сум ја читал поезијата на познатиот поет и новинар Иван Василевски од Струмица пред 20, па можеби и 30 години, не сум имал некое разбирање за поезијата, како и секој поет убаво напишани стихови за љубов, за тага, некои за минатото, некои за сегашниот живот, а некои пак напишале стихови кои посакуваат нешто да им се случи, а кај повеќето поети поезијата е чуства и емоции, но ретко кој друг може да ги почуствува, ако не ја знае судбината на авторот.

По толку многу години, истата таа поезија на Иван Василевски што сум ја читал, преку филмот на Кире Пиличев и интерпретацијата на Мариета Дуќиќ, Сузана Мицева и Ана Витанова Рингачева, дамите кои со својот глас, интерпретација, но и од низ патеките на Преведена, облечени согласно чудесно зачуваните убавини на природата, е сосема друга поезија, сега разбирлива, емотивна, и кога ќе го гледате филмот и ги слушате зборовите од стиховите, го чуствувате тоа ежење на кожата, не дека ја знаете приказната на авторот, туку го чуствувате тоа како ваша приказна од животот во кој го живеете.

Тетка Смиља, сопругата на Иван Василевски, која прва го читаше секој негов создаден стих, но и која му беше инспирација да создаде нов, во филмот „Куќа на ѕвездите“ раскажува за таа куќа и местото околу неа кое е извор на нивната најголема радост и тага и одиграло важна улога во животот и творештвото на Иван Василевски. Таму е и Иван, таму е и нивниот син Вартан во вечниот дом на Преведена, а таму живее и Смиља опкружена со нив, природата, спомените, омилените предмети и семејните албуми.

Премиерното прикажување на филмот „Куќа на ѕвездите“ во посебен амбиент создаден за тој поетски настан, пред многуте луѓе во Храмот на културата во Струмица побуди силни емоции, но и љубов, а во пресрет на патрониот празник на градот, Ѓорги Џингов, кој живее и работи во Скопје, но е струмичанец, во име на љубовта кон градот Струмица додели плакети на Општина Струмица, кој е покровител на поетскиот настан, на Смиља Василевска и на Мелани Иванова од Штип, која ја доби наградата по повод распишаниот конкурс на Друштвото за наука, литература, култура и уметност „Иван Василевски“. (Р.Ѓ.)

ФОТОГАЛЕРИЈА