![almak](https://strumicanet.com/wp-content/uploads/2025/08/srnet-banner-sofa-bed-garnituri-2025-1-optimized.jpg")
Вчера, на денот кога е роден Видое Подгорец, од пред 90 години, училишниот двор и селото Колешино и годинава беа полни со многу ученици од повеќе градови и села на Македонија. Беше полно и со писатели, со ликовни уметници, со наставници, децата во природа цртаа, пишуваа, читаа поезија, раскази, беа актери. Се одржа завршниот настан од Меѓународната литературна манифестација „Средби под јаворите – Видое Подгорец 2024“ со поддршка на Министерството за култура и општините Струмица и Ново Село.
Завршниот настан беше збогатен и со креативна работилница на тема: „Шарени бродови“ по инспирација од книгите на Видое Подгорец и доделување на наградите за децата и наставниците по сите распишани конкурси.
„Годинава манифестацијата „Средби под јаворите – Видое Подгорец“ беше во знакот на големиот јубилеј – 90 години од раѓањето на подбеласичкиот исполин. Најголема радост ни причинува фактот дека повеќе од 500 дечиња заедно со своите наставници земаа учество како во конкурсите, така и на двете големи приредби организирани во Струмица и Колешино. Видое Подгорец е наша вредност и гордост, а нашата најголема цел е неговото дело да го доближиме до децата, неговата најголема љубов“ – ни кажа претседателката на Здружението што ја организираше традиционалната манифестација во чест на Подгорец, проф. д-р Ана Витанова Рингачева.
Почнаа „средбите под јаворите“ – литературна манифестација во чест на големиот поет Видое Подгорец
По завршувањето на настанот сите учесници и гости се искачија на водопадите кај Колешино и пуштаа шарени бродчиња од хартија натоварени со желби.
