Патниот правец Бориево – Колешино конечно ќе се асфалтира, објави градоначалникот на општина Босилово, Ристо Манчев

„Патниот правец Бориево – Колешино конечно ќе се асфалтира. На задоволство на граѓаните на општина Босилово и Ново Село во тек се активности за асфалтирање на патниот правец Бориево – Колешино. Станува збор за делница од 3.2км и ширина од 5м. Овој патен правец е од исклучителна важност за развојот на регионот затоа што создава подобри услови за развој на туризмот во регионот и поврзување на подбеласичкиот регион со Моноспитовско Блато и подогражденскиот регион, развој на земјоделието преку подобар, поекономичен и побрз транспорт на земјоделските производи и обезбедува пристап до голем број обработливи земјоделски површини, развој на сообраќајот и поврзување на Колешино со регионалниот пат А4 кој води кон границата со Бугарија, развој на алтернативниот туризам, велосипедизмот“, објави градоначалникот на општина Босилово, Ристо Манчев.

Средствата за реализација на овој проект во висина од околу 370.000 евра се обезбедени преку Центарот за развој на Југоисточниот плански регион и дел од Буџетот на општините Босилово и Ново Село.

Инаку станува збор за локален патен правец со вкупна должина од 6300 метри, а претходните градоначалници на општините Ново Село и Босилово, Никола Андонов и Зоран Зимбаков со средства од Бирото за регионален рамномерен развој, обезбедени од Центарот за развој на Југоисточниот плански регион, во 2020-та година реализираа околу 3200 метри, односно 1500 метри од страна на општината Ново Село и 1700 метри од страната на општината Босилово.

Градоначалникот Манчев објави дека денеска увид на реализацијата на проектот направил и претседателот на ВМРО-ДПМНЕ, Христијан Мицкоски кој бил во посета на Ново Село.