Општина Василево и турската општина Согут се збратимија

Градоначалниците на општина Василево, Славе Андонов и општина Согут, Турција, Исмет Север денеска во Василево потпишаа акт за збратимување на двете општини.

Во документот меѓу другото стои дека ваквиот чин има заедничка цел за зголемување на соработка во областа на културата, економијата, социјалната заштита и урбанизмот, со намера за реализација на заеднички активности.

Намерата е во интерес на граѓаните од двете општини да се развие дијалог и да се зацврсти соработката. Да се разменуваат искуства и преку реализирање на заеднички активности, делувајќи во атмосфера на доверба и дух на солидарност да се придонесе за заеднички развој.

„Ова е прво збратимување на општина Василево. Досега сме имале соработка со повеќе општини како од Република Турција и други држави, но денеска за прв пат ваквата соработка е официјализирана со потпишување на акт за збратимување. Како што стои и во официјалниот акт намерата е двете општини, за доброто на нашите сограѓани да реализираме заеднички активности и проекти кои ќе придонесат за зближување на граѓаните и подобрување на условите во одредени области во кои како локални самоуправи имаме надлежност“ – кажа градоначалникот на општина Вaсилево, Славе Андонов.