Старото училиште во Иловица и Центарот за млади во Радово, општина Босилово ќе бидат пренаменети во детски градинки.
„Општина Босилово аплицираше и ја помина првата фаза од проектот. Во втората фаза ќе биде опфатена изработка на градежни проекти според кои овие објекти ќе бидат реконструирани и адаптирани во детски градинки по сите стандарди на Министерството за социјална политика, демографија и млади, а третата фаза е градење и пуштање во функција. Целиот процесот се очекува да трае од 12 до 18 месеци“ – информираше градоначалникот на општина Босилово, Ристо Манчев.
Со завршувањето на овој проект во општина Босилово ќе функционираат четири детски градинки, во Босилово, во Моноспитово и најавените во Иловица и Радово.
Градоначалникот Манчев информираше дека е во постојана комуникација со надлежното Министерство за забрзување на процесот за полагање и издавање на лиценци, со што ќе се обезбеди потребниот кадар за нормално функционирање на градинката во Моноспитово и во другите населени места.
