![almak](https://strumicanet.com/wp-content/uploads/2025/04/srnet-banner-sofa-bed-garnituri-2025-optimized.jpg")
Денеска на центарот во Босилово за прв пат беше организиран Новогодишен базар во пресрет на Новогодишните и Божиќните празници.
Мирисот на домашни колбаси доминираше покрај штандовите, греано вино, топол чај за посетителите. Ученици направија свои рачни ракотворби, постарите граѓани традиционални колачиња, но и украси кои се продаваа. Пред насобраните жители на Босилово, но и од околните населени места беше организирана музичка забава со младите таленти Марија Кичевска, Боркица Бансколиева, Бисера Гавровска и Милани Илиева, како и музичарот Игор Ангелов.
„Скромно замислено, прекрасно организирано. Неописливо пријатна атмосфера и дружење помеѓу сите генерации. Прекрасни ракотворби, греано вино, греана ракија, топол чај и домашни колбаси. А и Дедо Мраз беше тука за да ги забавува најмладите“ – вели градоначалникот Ристо Манчев.
Новогодишниот базар е дел од програмата на настаните кои Општина Босилово ги организира во пресрет и за време на празниците „Новогодишна магија – Босилово 2025“.
Следниот настан е утре (понеделник) во селото Секирник, во 10:00 часот. Во Домот на културата во Секирник учениците од ООУ „Св. Кирил и Методиј“ од Иловица ќе изведат новогодишна претстава за деца.
На 3 јануари (петок) од 19:00 часот во Домот на културата во Босилово, КУД ФА „Гоце Делчев“ од Босилово ќе одржи Новогодишен концерт.
На 4 и 5 јануари (сабота и недела) во Мултифункционалниот центар во Босилово ќе се одржи Новогодишно-Божиќен турнир во шах.
На првиот ден од Божиќ, 7 јануари (вторник), Општина Босилово ќе организира Хуманитарна акција – „Божиќни празници за сите“, на која ќе дели пакети со храна и пијалоци за социјално загрозени семејства.
На 9 јануари (четврток), во 13:00 часот по четврти пат во Етно ресторанот „Кај Виктор“ ќе се одржи традиционалната Божиќна средба „Сите сме исти и сите заслужуваме радост“.
Последниот настан од „Новогодишната магија – Босилово 2025“ ќе се одржи на 12 јануари (недела) од 18:00 часот во Домот на културата во Босилово, каде ќе биде прикажан новогодишниот филм „Јорговани“.
