На местото на стариот Суд во горниот дел на градот Струмица, кој се наоѓа веднаш до Црквата „Св. Кирил и Методиј“, ќе се гради Митрополија на МПЦ – Струмичка Православна епархија. Советот на општина Струмица на денешната седница едногласно донесе одлука овој објект, кој е во руинирана состојба да и го отстапи на трајно користење на Струмичката епархија.
Според одлуката, со давањето на трајно користење на објектот се дава и право на целосна реконструкција според постоечкиот проект и техничката документација, а врз основа на добиени согласности од Заводот за заштита на спомениците на култура и Музеј и Управата за културно наследство.
„Ова навистина е важен момент за Струмица и важен момент за одлуките на Советот којшто верувам во духот на единството и во духот на поддршката на вистинските вредности коишто ги негува и штити Струмица, а ќе биде нескромно да не се спомне под силната закрила на Православната црква, а особено на Струмичката епархија, но мора да признаеме дека сме една од ретките Општини, една од ретките епархии коишто немаат своја Митрополија и тоа мораме да го корегираме. За таа цел одлучивме Стариот суд за кој што од страна на Општината се обезбедени заштитно-конзерваторски извештаи, изготвен е проект, изготвена е пресметка и за рушење и за градење на Митрополијата и би сакал со нив да ги запознаам и советниците и граѓаните. Потребните средства за рушење би биле 1.404.962 денари, а за изградба на Митрополијата 31.257.631 денар согласно пресметките. Убеден сум дека Струмичката епархија заедно со силна поддршка на општина Струмица и заедно со многу одговорни компании ќе успееат да го реализираат она што навистина го заслужуваат верниците од општина Струмица“ – кажа градоначалникот Костадин Костадинов, образложувајќи ја одлуката.
Овој објект по реконструкцијата ќе биде официјално седиште – Митрополија на Струмичката Православна епархија.
