Мега популарната актерка од поранешните ЈУ простори Лидија Вукичевиќ, која публиката ја познава по култните серии: Бољи живот, Жикина Династија и многу други тв и театарски проекти, како „обвинителка“ во истоимената претстава на 27 мај е во Центарот за култура „Антон Панов“ во Струмица. Ќе биде изведена претставата „Обвинителка“ чиј автор е Огнен Неделковски, а режијата ја потпишува актерот Сашо Ристовски. Покрај Вукичевиќ на сцената ќе ги видиме нашите познати актери Магдалена Ризова – Черних и Сашо Ристовски. Сценографијата е на Крсто Богојевски, а музиката за претставата е дело на талентираниот и популарен музичар, Мишел Трајковски.
Оваа комедија е копродукција и размена на уметници од Македонија и Србија. Претставата се игра и на македонски и српски јазик.
Спојот на уметници и соработници од двете држави треба да се зајакне, затоа што културата обединува, а преку хит комедијата „Обвинителка“ ќе го прикажеме тоа пред публиката кај нас и во регионот, велат организаторите.
Како е да се работи во обвинителство? Како е да се биде обвинителка? Како е да се биде обвинет? Како да се спасиш од обвинение? Тоа се дел од прашањата кои ќе бидат одговорени низ урнебесните комични ситуации во претставата.
