Новиот директор на Казнено-поправната установа „Затвор Струмица“, Зоран Ристов на својата прва прес конференција кажа дека до моментот од КПУ „Затвор Струмица“ во бегство се дале 23 затвореници, а за тоа го обвини претходното раководство на затворот.
„Во изминатиот период во пракса било преку телефонски повик да се даде погодност на затвореник со зборовите „Јас стојам зад тоа“. Ваквите процеси во претстојниот период уредно ќе се истражат. Ова пракса во КПУ „Затвор Струмица“ завршува и одговорност мора да следува. Прва моја задача е се врати достоинството и работниот имунитет на вработените. Да престанат конструкции, лажни објави на социјални мрежи и привилегии за одредени затвореници. Застанувам против секој обид за рекет, изнуда и притисок. Очигледно, тоа е намерен инструмент за да се создаде клима за манипулација“, кажа директорот Ристов, потенцирајќи дека согласно Законот за извршување санкции и куќен ред, струмичкиот затвор ќе го врати нормалниот процес на ресоцијализација на осудените лица.
„Завршува времето на омаловажени и искористени осудени лица. Според лични желби на одредени вработени лица, осудените лица биле приморани да извршуваат работни задачи на приватни имоти, особено градежни активности. Извештајот за овие случувања исто така е во тек на изработка. Санкциите ќе бидат неизбежни“, додаде Ристов.
Ристов тврди дека во изминатите 7 години оваа институција се водела без законски предвиден Годишен план за работа, била доведена на работ на егзистенција, а со тоа и нарушување на безбедноста внатре и надвор од институцијата.
„Затоа, заедно со целиот колектив ќе предложиме Годишен план за работа подобрување на стандардот на затворениците во делот на услови за живот и работа, зголемен работен ангажман на осудени лица, нови протоколи за соработка со правни лица, пристапивме кон поправка на електричната инсталација и одвод, поправка на возилата на институцијата и еден од најбитните елементи е степенот на контрола на влез и излез да биде подигнат на највисоко ниво“ – информираше на денешната прес конференција директорот на струмичкиот затвор, Зоран Ристов.
