![almak](https://strumicanet.com/wp-content/uploads/2025/08/srnet-banner-sofa-bed-garnituri-2025-1-optimized.jpg")
Струмичкиот Народен театар во недела на големата сцена во Центарот за култура „Антон Панов“, премиерно ќе ја постави детската претстава „Царевата нова облека“ од Ханс Кристијан Андерсен, а во режија на познатата струмичка актерка, Јасмина Вучкова.
Директорката на НУ Центар за култура „Антон Панов“, Белагија Аливкинова вели дека со овој проект, имајќи го во предвид малиот број на изведби и продукции за најмладата популација во Струмица, младите ќе имаат можност да учествуваат, да сведочат за еден спектакл од светски рамки на наш јазик, а со кој ќе се имплементираат нови песни на македонски јазик и нивно афирмирање и препознатливост.
„Преку оваа претстава сакаме да раскажеме приказна на еден поинаков начин за еден цар којшто бил измамен, кој верувал во нешто кое воопшто не постоело“, додаде директорката Аливкинова на прес конференцијата како најава за премиерната изведба на претставата „Царевата нова облека“.
„Самобендисаноста и себичноста, кои го тераат човека да гледа единствено кон себе, наспроти емпатијата и грижата, кои му даваат поширок светоглед. Доброто наспроти злото и лагата наспроти вистината. Повеќеслојноста на текстот отвора и други теми, но овие се клучните кои треба да ја засегнат најмладата публика. Во претставата публиката ќе биде директно вклучена заземајќи страна и тоа ќе придонесе за активно размислување на децата. Сето тоа ќе биде прикажано и раскажано на многу игрив и динамичен начин, преку креативни сцени, дијалози, низ танц и песна“, вели режисерката Јасмина Вучкова.
Осум актери на струмичкиот Народен театар ќе играат во оваа претстава предводени од Царот – Кољо Черкезов. Коста Ангов ќе биде шутот, гласникот и раскажувачот, царската кројачка е Оливера Аризанова – Мансбарт, а нејзината ќерка е Анкица Бенинова. Улогата на првиот измамник ја игра Стојан Велков – Трн, а вториот измамник Танкица Стојанова, додека царскиот советник за мода е Ванчо Василев, а првиот дворјанин и дворски сликар е актерот Игор Тодоров.
Драматизацијата ја напиша Ацо Гогов, изборот на костими е на Ванчо Василев, сценскиот дизајн го подготвија Ванчо Василев и Кољо Черкезов, а музиката е на Боби Ѓошиќ. Сликари – изведувачи се Александар Филев и Ана Божијанова.
Недела, 8 октомври | 12:00 часот | Центар за култура – Струмица
