Николоски и Милошоски со својот тим од Струмица им се заблагодарија на струмичани и граѓаните на Македонија за големата поддршка

„Денеска продолжуваме со кампањата за парламентарните и претседателските избори, денеска се спојуваат повторно двете кампањи. Продолжуваме тука од Струмица каде што планираме големи проекти по формирање на влада предводена од ВМРО-ДПМНЕ“, кажа потпретседателот на ВМРО-ДПМНЕ и носител на листа за пратеници во изборна единица 4, Александар Николоски, повикувајќи ги сите граѓани да ја прочитаат програмата „Платформа 1198“, каде, како што кажа, се нудат решенија за најкрупните проблеми на граѓаните, пред се во делот на владеење на правото и воспоставување на функционален систем на владеење на правото и правна држава, за економскиот развој, решенија за состојбите во образованието и во здравството, поддршка за пензионерите, но и за најмладите преку проектот „Купи куќа”.

Тој додаде дека за нив е огромна привилегија поддршката која што ја добиле вчера.

„Сметаме дека резултатот кој што вчера го постигна Гордана Силјановска Давкова и ВМРО-ДПМНЕ е обврска во следните две недели уште поинтензивно да се среќаваме со сите кои што сакаат да се сретнат со нас, да го објасниме нашиот концепт и визија и да ја побараме поддршката. Очекувам на 8 мај да има убедлива победа за Гордана Силјановска Давкова и најмногу пратеници за ВМРО-ДПМНЕ, којшто ќе овозможат стабилна Влада која што нема да биде уценува од никого и којшто ќе овозможат во опозиција да одат и СДСМ, но и политичката партија ДУИ“ – кажа Николоски.

Николоски истакна дека особено е среќен што имаат победа во Струмица.

„Тоа мислам дека е голем сигнал не само за Струмица, не само за струмичката околија туку за цела Македонија. Победата за Струмица за мене е најдрага од сите победи вчера, сакам да се заблагодарам на тимот позади мене, во следните две недели ќе работиме уште поинтензивно за да имаме уште поубедлива победа и Струмица конечно да го добие она што го заслужува, а тоа е економски развој и воведување на функционална правна држава каде што ќе има јасно владеење на правото, а не она што се случуваше во годините наназад“ – изјави Николоски.