Независниот синдикат на полицијата денеска низ улиците на Струмица организираше мото-протестен марш

Независниот синдикат на полицијата денеска низ улиците на Струмица организираше мото-протестен марш како дел од најавениот Полициски протестен караван.

Тие побараа итна промена на Законот за полиција и Кривичниот законик и пропишување на минимална казна затвор од пет години за напад на полициски службеник, потсетувајќи на неодамнешниот напад од поголема група граѓани врз полициски службеник во селото Баница, кој притоа се здоби со тешки телесни повреди и траен инвалидитет.

„Полициските службеници секојдневно се напаѓани, малтретирани и повредувани, а кога се обидуваат да се заштитат против нив се покренуваат обвиненија за малтретирање во вршење на службата“, велат од Независниот синдикат на полицијата.

Ги повикаа министерот Оливер Спасовски, Владата и сите останати политички партии и чинители да ги поддржат нивните протести по примерот и поддршката на протестите на маргинализираните групи и заедно да се крене свеста за потребата од поголема заштита на полициските службеници, како и за достоинствена плата, најавувајќи го следниот мото-протестен марш на 18 ноември во Куманово.