Од 11 септември, Денот на ослободувањето на градот Струмица се воведува јавен градски превоз на територијата на општина Струмица преку новоформираното Јавно сообраќајно претпријатие „Струмица Транспорт“. За почеток граѓаните бесплатно ќе можат да се возат од една до друга дестинација, односно околу еден месец како тест период на ставањето во функција на електричните автобуси.
Општината овие 10 автобуси ги набави на лизинг за 7 милиони евра од компанијата „Аутомакедонија“. Автобусите се со капацитет од 21 седиште и 22 позиции за стоење.
„Испишуваме историја во Струмица, бидејќи досега немавме автобуски превоз. Струмица е загадена, па се одлучивме да воведеме електрифициран јавен превоз. Со тоа стануваме прв град во регионот со електричен превоз“ – кажа градоначалникот на Струмица, Костадин Костадинов на денешната прес конференција во компанијата „Аутомакедонија“ во Скопје, каде заедно со директорот на „Струмица Транспорт“, Драги Поп-Стојанов ги зедоа клучевите од новите електрични автобуси.
После тест периодот кој ќе биде бесплатен, билет во еден правец ќе чини 30 денари, а струмичани ќе можат да си набават и месечен билет, планирано е и бесплатно возење во одредени денови за пензионерите.
