Готвачите на „Ројал Парк“ за денеска напладне подготвија 1500 порции бел грав, како дел од традиционалното одбележување на Чист понеделник во рамките на програмата на годинашното издание на Струмичкиот карневал.
Годинава гравот не се готвеше на отворено на плоштадот во огромниот казан, кој беше атракција за струмичани во изминатите 3-4 години, се готвеше во кујната на ресторанот „Ројал Парк“, а беше поделен на плоштадот „Гоце Делчев“ во убаво спакувани порции, со кои секој граѓанин можеше да се послужи и да си понесе за дома или за на работа.
Белиот грав го благословија свештеници на Струмичката Епархија во присуство на голем број граѓани, градоначалникот на Струмица, Костадин Костадинов, советници, а првата порција беше за градоначалникот, тој прв го вкуси, вели дека бил премногу вкусен, готвачите одлично си ја завршиле работата.
Денеска, утре и среда, се деновите познати како Тримери, кога верниците подготвуваат само посна храна. Всушност, од денеска започнува Велигденскиот пост.
