![almak](https://strumicanet.com/wp-content/uploads/2025/08/srnet-banner-аugust2025-optimized.jpg")
Во Градската Уметничка галерија во Струмица е поставена изложба на досега неизложени дела кои се создадени на Меѓународната Струмичка ликовна колонија, а меѓу триесетте слики забележавме слика од 1963-та, на првото издание на колонијата, па се до 2000-та година. Меѓу нив се дела на ликовните уметници Васко Ташковски, Александар Ристески, Бранко Кончалиев, Мачонг Лудвиг, Танас Луловски, Зоран Малиновски, Боро Иљовски, Димитар Стојчевски, Рујта Кашавомото, Милан Граховац, Станко Ѓоргиев, Јерг Фишер, Живко Хаџи-Пазов, Дорис Рихтер, Румен Лаптев, Радуле Анѓелковиќ, Данчо Калев, Мило Павловиќ.
Овие дела биле чувани во депото на најстарата ликовна колонија во Македонија, а за да бидат на показ пред граѓаните, љубители на ликовната уметност е направена козервација и реставрација од страна на ликовниот уметник, Александар Филев.
Изложбата е отворена во рамките на програмата по повод одбележувањето на 11 Декември – Денот на заштитниците на Струмица, Свети Петнаесет Тивериополски свештеномаченици.
„Вечерва треба да се чувствуваме привилегирани што ја имаме таа ретка можност да бидеме сведоци на овој струмички ликовен времеплов. А кога сме кај тој времеплов, вредно е да се каже дека следната година Меѓународната струмичка ликовна колонија ќе го одбележи јубилејот – шест децении постоење, а во досегашните 59 изданија, создадени речиси 2800 дела во различни ликовни дисциплини, создадени од ликовни творци од целиот свет“, кажа советникот Ице Беличев, отворајќи ја изложбата.
