На патот од Струмица кон браната Водоча две лица со возило излетале во провалија длабока пет метри, минале без повреди

На патниот правец од Струмица кон браната Водоча вчера имало излетано возило надвор од патот на длабочина од пет метри, информираат утринава од Центарот за управување со кризи (ЦУК).

Регионалниот ЦУК од Струмица, за излетаното возило добил пријава од граѓанин, по што веднаш биле известени СВР Струмица и Противпожарната единица на Струмица кои излегле на терен.

„Околу пладне била добиена пријава од граѓанин за излетано возило од патот на патниот правец од Струмица кон браната Водоча. Веднаш биле известени МВР и ТППЕ Струмица кои излегле на терен и констатирале дека се работи за излетано возило надвор од патот на длабочина од пет метри. Лицата ги немало во и околу возилото, биле барани и било констатирано дека имало две лица коишто за среќа не биле повредени“ – информираат од ЦУК.

Двете лица, додаваат од ЦУК, сами го напуштиле местото на настанот и случајот не го пријавиле навреме.

Излизганото возило од долот длабок пет метри, од ЦУК велат дека вчера попладне било извлечено.