На денот на големото карневалско дефиле градоначалникот на Струмица објави дека ќе бара да се разреши карневалскиот одбор

Градоначалникот на општина Струмица, Костадин Костадинов на Фејсбук објави дека на следната седница на Советот на општина Струмица ќе побара да бидат разрешени сите членови на Организациониот одбор на „Струмички карневал“, според објавата „имало обиди за груба партизација“.

Конкретно не прецизира за што станува збор, но најави дека новите членови ќе се избираат по пат на Јавен повик, а не како до сега, од страна на Советот на општината. За ваквата негова одлука го известил и претседателот на Советот на општина Струмица, Марјан Даскаловски.

„Почитувана Струмицо, нашиот карневал е составен дел на нашиот идентитет и никој ама баш никој нема право да го чепка, разурнува или да прави груби обиди за партизација. Сметам дека е време за одлуки, Карневалскиот одбор е тело во состав на Советот на општина Струмица. Денеска го известив претседателот на Совет дека на прва наредна седница ќе поднесам точка со која сите членови на карневалскиот одбор ќе бидат разрешени. Се надевам дека предлогот ќе биде прифатлив за огромно мнозинство на Советот. Дополнително, нови членови да се одберат по пат на Јавен повик на кој ќе можат да се пријават луѓе, локал патриоти вљубеници во културата, млади кои сакаат да го градат духот на карневалот, така како што заслужува Струмица“ – напиша Костадинов.