На денешен ден почина македонскиот поет и новинар од Струмица, Иван Василевски

На денешен ден пред 8 години почина познатиот новинар, поет, драмски писател и публицист од Струмица, Иван Василевски.

„Иван Василевски од зборот направи зборопис, налик на фрескоживопис. Човек кој што калигравски го извади зборот за да ги создаде најубавите поетски изблици. Таа поезија е на некој својствен начин посебна, единствена, оригинална“ – ќе рече д-р Ана Витанова Рингачева за Иван Василевски.

Пред пет години група струмички поети формираа Друштво за наука, литература, култура и уметност, кое го носи името Иван Василевски, а во негова чест и спомен во НУ Центар за култура „Антон Панов“ во Струмица беше отворена Спомен соба на македонскиот поет и новинар, кое е и седиште на оваа друштво што го негува споменот на Василевски.

Иван Василевски роден е во селото Босилово, струмичко, во 1947 година. Работеше како новинар во Македонското радио – Радио Скопје, беше директор на некогашната Радио Струмица, дописник на некогашната југословенска новинска агенција ТАНЈУГ, а пред пензионирањето работеше во Македонската информативна агенција МИА. Беше член на Друштвото на писателите на Македонија од 1991 година и активен член во работните тела на Друштвото на писателите на Македонија. Во два мандата беше член на Претседателството на ДПМ.

Иван Василевски е автор на книгите „Привев во тишината“, „Црнорисци“, „Куќа на ѕвездите“, „Заточени души“, „Утки“, „Наташа“, „Поеми за тишината“, „Потомците на Чрт“ и „Одмеѓување на светот“. Автор е на романот „Антон Хлебец“, на драмата „Лоза“ и на повеќе монографски и медијавистички изданија. Добитник бил на високи книжевни изданија, меѓу кои и на „Ацо Шопов“, „Григор Прличев“ и наградата „Дијалог“.

Иван Василевски е добитник на наградата за животно дело во 2013 година на Општина Струмица, за посебен придонес во областа на литературата, публицистиката и новинарската професија.