На денешен ден (24 Ноември 1989 година) во Скопје починал Александар Думов – актер, првенец на Народниот театар „Антон Панов“ во Струмица.
Роден 25.02.1923 година во Струмица. Пионер на театарската дејност во Струмица. Над четири децении беше еден од столбовите на Струмичкиот театар. Во повеќе наврати бил и директор. Дел од својата артистичка кариера ја поминал во Велешкиот и Битолскиот театар.
Од 1 Мај 1949 година, кога со премиерата на „Бегалка“ свечено беше отворен Градскиот народниот театар во Струмица, па до пензионирањето, играл речиси во сите претстави, а во многу од нив ги толкувал главните улоги. Незаборавни ќе останат особено неговите актерски креации во текстовите од комедиографскиот жанр. Остварил над 200 улоги, а од нив позначајни се во претставите: „Смеа низ сокаците“, „Дамки“, „Соблазна во Шентфлоријанската долина“, „Тутунскиот пат“, „Сенката“, „Сомнително лице“, „Нороден пратеник“, „Женидба“, „Лажа и паралажа“, „Чорбаџи Теодос“, „Измама“, „Антица“, Поп Киро и поп Спиро“, „Нажалена фамилија“, „Власт“, „Покондирена тиква“, „Кир Јања“, „Чест“, „Женачка и мажачка“, „Македонска крвава свадба“, „Госпоѓа министерка“, „Бегалка“, „Големата игра“, „Смртта на Тарелкин“, „Дундо Марое“, „Протекција“ и други.
Во струмичкиот Народен театар „Антон Панов“ режирал повеќе претстави.
На Театарските игри „Војдан Чернодрински“ во Прилеп ги освоил наградите за актерски остварувања во претставите: „Смеа низ сокаците“ (Спиридон и Шликачот, 1969), „Дамки“ (Ставре, 1971), „Соблазна во Шентфлоријанската долина“ (Ѓаволот, 1975), „Сенката“ (Даскалот, 1988).
Актерот Александар Думов е добитник е на Годишната награда на Општина Струмица.
