Струмичанката Кумјана Новакова за филмот „Молкот на разумот“ ја доби наградата за најдобра режија во програмската секција Envision на најголемиот светски фестивал за документарен филм ИДФА, во Амстердам. Наградата ја доделува петчлено жири, a фокусот на натпреварувачката програмска секција Envision е на меѓународни или светски премиери на филмови со посмела форма, каде авторите и пристапуваат на реалноста од поинаков агол и ги истражуваат најдалечните граници на документарната уметност.
„Членовите на жирито ја истакнуваат режисерката за нејзиното ригорозно презентирање на форензички докази и неверојатната храброст на жените чие сведочење овозможи силувањето да биде меѓународно признато како воено злосторство. Кумјана Новакова на филмски начин направи овие злосторства никогаш да не ги заборавиме“, пишува жирито во образложението.
Во своето видео обраќање, Новакова истакна дека „Молкот на разумот“ е филм кој е резултат на солидарноста на жените кои не само што ја преживеале војната, туку се издигнале над насилството за да го уништат самиот концепт на насилство.
„Не сакам да зборувам за тоа колку е важен филмот, туку колку е важна солидарноста. Ако имаме барем малку интегритет, сите заедно во еден глас ќе побараме прекин на огнот и ослободување на Палестина веднаш. Не постои историска, политичка или која било друга причина која може да се користи како аргумент за уште еден геноцид да биде на рацете на човештвото. Крај на сите форми на опресија. Крај на сите форми на насилство“ – кажа Новакова.
„Молкот на разумот“ светска премиера имаше летово на Сараевскиот филмски фестивал каде го освои срцето на Сараево за човекови права. Во наредните неколку денови следуваат националните премиери на филмот на Авторскиот филмски фестивал во Белград, на Торино филм фестивал во Италија, во официјалната меѓународна натпреварувачка програма, и во Полска, на WatchDocs фестивалот, во меѓународната натпреварувачка програма. Кон средината на декември филмот ќе има специјална проекција во Скопје. „Молкот на разумот“ е поддржан со уметнички грант од страна на БИРН, а е во македонско-босанска копродукција.
