![almak](https://strumicanet.com/wp-content/uploads/2025/08/srnet-banner-sofa-bed-garnituri-2025-1-optimized.jpg")
Концерт на бендот „Чалгија саунд систем“ се случи синоќа на камерната сцена во Центарот за култура „Антон Панов“ во Струмица. Оние што дојдоа ја имаа привелигијата да уживаат во една тивка, непомпезна музика, каква што е чалгијата, но моќна со секоја отсвирена нота во македонската староградска песна.
Два часа со убавите чалгиски звуци, моќната интерпретација на Добрила Грашеска, која во директната комуникација со публиката, направи чувство на музичка интимна седенка во која публиката си потпевнуваше, со рацете го следеше ритамот на инструменталистите и буквално со насмеани лица уживаше во прекрасниот концерт на „Чалгија саунд систем“. Бенд кој своето деби го имаше уште во 2010 година со издавањето на својот прв албум на кој беа отсвирени и отпеaни најубавите македонски чалгиски песни. По 9 години бендот издава уште еден албум насловен „Тихувај“, како провокација за авторски поглед на нова чалгија во која беа вметнати современи звуци.
На синоќешниот концерт публиката уживаше во звуците и интерпретациите на познатите македонски староградски песни: „Ајде дали знаеш паметиш Милице“, „По друм одам мајче“, „Кажи Јано, кажи душо“, „Дафино вино црвено“, легендарната „Македонско девојче“, неколку чалгиски ора, но и нови песни од последниот нивни албум со чалгиски звук.
Инаку, „Чалгија саунд систем“ е бенд којшто со самите почетоци наиде на одличен прием во Македонија, остварувајќи со тоа огромен број концертни настапи насекаде. Но бендот ги пренесува звуците на чалгијата и низ светот, одржувајќи концерти во Турција, Грција, Србија, како и на еден од најголемите светски фестивали на музиката во Рудлштад, Германија, каде во 2022 година ја делеше сцената со најголемите ѕвезди на балканските и светските простори.
