Директорот на Центарот за управување со кризи, Стојанче Ангелов денеска на покана на градоначалникот на oпштина Босилово, Ристо Манчев го посети мостот во атарот на селото Секирник, кој е видливо оштетен, во лоша состојба, уништен е еден од носечките столбови и претставува опасност за тие што го користат.
Мостот секојдневно го користат земјоделците не само од Секирник туку и околните села кои на директорот на Центарот за управување со кризи, Стојанче Ангелов му се пожалија дека мостот силно вибрира кога поминуваат со своите трактори. Станува збор за прилично фреквентен мост, кој го користи населението од овој регион за извршување на земјоделски работи на околу 50 хектари.
„Еден од носечките столбови, штој ја држи носечката конструкција е паднат и со тоа стабилноста на мостот е значително нарушена. При движење преку мостот можат да се почувствуваат силни вибрации. Повеќе од очигледно е дека овој мост не е безбеден и затоа и препорачуваме на Општина Босилово да ангажира стручни лица за да ја испитаат стабилноста на мостот и ќе утврдат дали може да се санира или целосно треба да биде затворен и да се изгради нов мост. Како ЦУК препорачуваме на Општина Босилово да го затвори за движење овој мост затоа што за нас безбедноста на луѓето е на прво место“ – кажа Ангелов.
Градоначалникот на општина Босилово, Ристо Манчев истакна дека ќе испратат барање до ЦУК и до Владата за да може заедно да се санира овој мост.
„Станува збор за надлежност на локалната самоуправа, но заради ограничените можности на општината бараме поддршка и од Владата како би можеле во иднина да изградиме мост кој е многу важен за локалното население“ – кажа градоначалникот Манчев.
Земјоделците од овој регион кои преку него поминуваат со тешка земјоделска механизација бараат што побрзо да се санира мостот, бидејќи нема да можат до дојдат до своите ниви.
