![almak](https://strumicanet.com/wp-content/uploads/2024/05/sr-net-maj-2024-optimized.jpg")
Возбудени, пресреќни што беа манекени, што толку народ се собра околу нив да ги поддржат, што за миг беа ѕвезди и чекореа на модна писта, направена специјално за нив на сред сала во Центарот за култура „Антон Панов“ во Струмица.
По 7-ми пат, во пресрет на меѓународниот Ден на лицата со попречност се одржа Манифестацијата „Убави сме, свои сме“ која веќе е бренд манифестација на Струмица, а ја организира Здружението за помош и поддршка на лица со Даун синдром „Вера“ од Струмица.
Зад здружението „Вера” стои Анче Туфекчиева, мајка на Верче, која е девојче со Даун синдром, позната како голем активист и жена која со својата мајчинска љубов и посветеност со години наназад допринесува за рушење на табуата, но и прифаќање и разбирање на различностите.
26 млади лица со попреченост продефилираа на модната писта во придружба на познати личности од јавниот, културниот, политичкиот и општествениот живот, што со своето несебично ангажирање гласно порачаа дека сите ние сме дел од едно исто општество и ист свет, а со тоа ни следуваат еднакви можности. Сите беа облечени во креации од различни бутици од Струмица, но и од градовите од каде доаѓаа, а ги имаше од цела држава.
Ова е една од ретките манифестации во земјава која е посветена на лицата со попреченост, и им дава можност да ја пренесат пораката дека секој е убав на свој начин.
