![almak](https://strumicanet.com/wp-content/uploads/2024/11/srnet-banner-noe-2-optimized.png")
Од денеска во Струмица ќе функционира Клуб за децата и младите со Даун синдром кој е насловен „Деца на сонцето“, а активностите во него ќе ги координира Здружението за поддршка и помош на лица со Даун синдром „Вера“ од Струмица. Овој пилот-проект е финансиран од Општина Струмица и ќе се реализира во наредните 12 месеци со надеж дека ќе продолжи и во наредните години.
За претседателката на Здружението „Вера“, Анче Туфекчиева овој единствен Клуб во Македонија за деца и младинци со Даун синдром, но и на нивните семејства ќе биде катче во кое преку игра, инклузивни и едукативни содржини ќе им овозможува подобри услови и услуги на децата и младинците, како што кажа Туфекчиева, „за да можат да бидат самостојни откако еден ден нас родителите не нема“.
„Јас како родител веќе 16 години живеам со пријателот Даун и ние сме гласни секогаш кога се работи за нашите деца. Даваме пример дека децата ниту се заразни, ниту болни и треба со наша помош, со сечија помош од општеството да си го добијат своето место“, додаде Туфекчиева, потенцирајќи дека во овој Клуб од понеделник до петок стручни лица и тутури ќе работат со овие деца и младинци, ќе се едуцираат и осамостојуваат како личности, а поддршка ќе добиваат и нивните семејства.
„Ова што денеска се случува е потврда дека Општина Струмица ја зајакнува соработката со граѓанските организации, Струмица потврдува дека е грижлив град во кој има место за сите. Како градоначалник сум оптимист дека овој проект кој е пилот проект и ќе трае 12 месеци ќе добие дополнителни средства од Буџетот на општината за наредната година и убеден сум дека советниците ќе изгласат пари за функционирање и по 12 месеци“, кажа градоначалникот на Струмица, Костадин Костадинов подарувајќи им го Клубот на децата и младинците со Даун синдром.
Клубот е сместен во повеќенаменскиот социјален центар во зграда на поранешната касарна во Струмица.
