Мицкоски: Платите на наставниците и професорите се зголемуваат за 5% со октомвриската плата, до крајот на мандатот ќе пораснат за 46%

Од октомвриската плата, која што ќе биде исплатена во ноември, па се до февруарската плата, којашто ќе биде исплатена во март 2025 година наставниците и професорите ќе имаат покачување на платата од 5%, а потоа во март 2025 година ќе имаат покачување од 7%, во март 2026 година во зависност од состојбата на Буџетот ќе имаат покачување на платата помеѓу 7,5% и 10%. Ова денеска го најавија премиерот Христијан Мицкоски и претседателот на СОНК, Јоаким Неделковски.

Договорено е, во зависност од состојбата на буџетот и во март 2027 година да има покачување помеѓу 7,5% и 10% и исто така зависно од состојбата на полнењето на Буџетот во март 2028 година ќе има помеѓу 10% и 12,5% покачување на платата, што би значело во март 2028-та наставниците и професорите во основното и средното образование треба да зeмаат отприлика минимум 46% повисока плата од таа којашто ја земаат денес.

„Благодарам на претседателот на СОНК. За мене е исклучително важно ова што го соопшти претходниот говорник дека после би рекол неколку неделни преговори и анализи, но и врз основа на она што го имаме како информација како се полни буџетот и што и како проектираме за годините кои што следат, сакавме да постигнеме договор којшто ќе биде долгорочен да не треба сега секоја година или секој месец повторно и повторно во јавноста се препелкаме па да има кризи, па да има закани ќе правиме штрајкови нема да правиме штрајкови и слично. Затоа беше многу важно ова што го постигнавме како договор, јас сум исклучително задоволен, заедно и со Министерството за образование и со Министерството за финансии, јас лично вклучен бев во овие преговори, разговори со Синдикатот на образованието, науката и културата. Така да што мислам дека се постигна договор којшто е историски во насока на подобрување на финансиската состојба на самите наставници и професори во основното и средното образование“ – кажа премиерот Христијан Мицкоски.

Мицкоски кажа и дека се договориле со синдикатот најдоцна до февруари, Колективниот договор биде завршен, потпишан и да се има една јасна основа како понатаму ќе можеме да се развиваме и кои ќе бидат коефициентите на сложеност на работните места, бидејќи сега имаме, би рекол условно кажано, нејаснотии во тој дел, додаде премиерот Мицкоски.