![almak](https://strumicanet.com/wp-content/uploads/2023/09/Almak10_2023.jpg")
Денеска на празникот Рождество на Пресвета Богородица, Митрополитот на Дидимотихо, Орестиада и Суфли, г. Дамаскин, кој од вчера е во Струмица отслужи Света Божествена Литургија во храмот „Покров на Пресвета Богородица и Св. Леонтиј“ во Водоча во сослужение со надлежниот Митрополит Струмички г. Наум и неговиот Викарен Епископ Стобиски г. Јаков.
„За време на Литургијата се потсетив на зборовите „колку е добро кога браќата живеат заедно“. Сите заедно околу Светата трпеза и да Го возљубивме Оној што ни го подари животот и Оној што ни ја подари перспективата на спасението, бидејќи гревот не оддели од Живиот Бог. Денеска се собравме овде да го прославиме големиот празник Раѓањето на Пресвета Богородица, бидејќи таа е причина да се роди Бог и да се роди нашата надеж за спасение. Таа е која нѐ води и ни го покажува патот на спасението кој е Исус Христос. Таа е која нѐ прегрнува и во среќни и во тажни моменти во нашиот живот“ – кажа г. Дамаскин во своето обраќање пред верниот народ.
Тој се осврна и на предизвиците пред кои се исправени сите балкански земји, а се поврзани со теми кои се неприфатливи за нас.
„Треба да бидеме свесни за светоста на семејството. Семејството е клетка на животот. Бог ја продолжува својата творба преку благословен брак и благословено семејство. За жал од запад ни доаѓаат многу верувања кои се туѓи за нашето верување и многу туѓи и непознати за културата на балканските народи. Затоа ве молам сите, да ги образувате вашите деца во христијанската вера, да бидат секогаш блиску до Црквата, до Христос и до Богородица“ – кажа г. Дамаскин.
Митрополитот на Дидимотихо, Орестиада и Суфли, г. Дамаскин му се заблагодари и на градоначалникот на Струмица, Костадин Костадинов за неговото присуство на Литургијата, истакнувајќи дека нивната работа е заедничка, да го водат народот по вистинскиот пат, подарувајќи му икона на Пресвета Богородица во спомен на празникот. Градоначалникот Костадинов од Митрополит г. Дамаскин доби покана тој како градоначалник и верниот народ да ја посетат неговата епархија и Цариград, како гости на Цариградскиот Патријарх г. Вартоломеј, со негов благослов.
„Ова за мене преставува голем поттик да продолжам да се борам со предизвиците на современието во духот на традиционалните христијански вредности“ – напиша на Фејсбук градоначалникот Костадинов.
ФОТО: Тивериопол.мк
