Министерот Љутков најави дека за една година ќе се пресече лента на старо-новиот театар во Струмица

На новинарско прашање за изградбата на Театарот во Струмица, министерот за култура и туризам, Зоран Љутков најави дека средства за негова доизградба ќе има во 2025 година.

„Мислам дека веќе постапката почнува да се отклучува и ќе предвидиме средства за 2025 година. Не уверија дека некаде за девет месеци до година дена, на тој Театар ќе може да се пресече лента“, кажа Љутков при денешната посета на археолошките локалитетот „БилаЗора“ кај Свети Николе, а најави и посета на културните институции во Струмица во наредните денови.

Обновувањето на стариот струмички театар на улицата „Боро Џони“ почна да се гради во март 2014 година, во времето на Никола Груевски, а тогашната министерка Елизабета Канческа Милевска најави дека ќе биде готов за 18 месеци. Во времето кога Зоран Заев беше премиер, министерката за култура Бисера Костадиновска Стојчевска, при посетата на театарот во изградба, во март 2022 година кажа дека за оваа година биле обезбедени 95 милиони денари и  според договорот склучен со изведувачот „Макаус“, требаше да биде завршен до крајот на таа 2022 година.

Според последната најава на сегашниот министер за култура од Владата на Христијан Мицкоски, до година во овој период „конечно“ треба да биде готов новиот струмички театар на местото на стариот со истиот лик од времето на неговото постоење.

Дали навистина актерите од театарот „Антон Панов“ и струмичани ќе добијат нов современ објект, останува надевањето до август 2025 година.