![almak](https://strumicanet.com/wp-content/uploads/2025/04/srnet-banner-sofa-bed-garnituri-2025-optimized.jpg")
На вториот ден од Божиќ, кога Црквата литургиски сиспомнува на Соборот на Пресвета Богородица и Светото семејството, Неговото Високопреосвештенство монсињор д-р Киро Стојанов, Скопски бискуп и Струмичко – скопски епарх, служеше света архиерејска Литургија во парохиската црква „Свети Пророк Илија“ во Радово.
На евхаристиското славење покрај верниот народ присуствуваа и министерот за внатрешни работи, Оливер Спасовски, началникот на СВР Струмица, Кирил Арапов и директорот на Комијата за односи со верските заедници и религиозни групи, Даријан Сотировски
Во својата проповед епископот Стојанов најпрво ги поздрави присутните честитајќи им го празникот Рождество Христово – Божиќ, а потоа се осврна на Светото Семејство кое е поттик за денешните семејства и воедно модел од кое можат и треба да бараат помош и застапништво.
Епископот Стојанов зборуваше и за опасностите со кои се соочуваат денешните семејства со цел да се намали нивната улога и значење во општеството, но истакна исто така дека семејството е загрозено и по неговото природно значење и смисла. Во семејството кое е според Божјиот идеал се случува неповторливо заедништво, во кое поединецот ја наоѓа својата цврста заштита, а општеството својата основа, нагласувајќи дека камен-темелник на секое семејство е Господ Исус Христос кој самиот посака да се роди во семејство – рече епископот Стојанов.
Монсињор Стојанов повика на молитва за семејствата за да бидат знак и сведоштво во светот во кој живееме и да го градат своето семејство според Божјата мерка, за да можат да го преобразат овој свет воспитувајќи ги децата според примерот на Светото Семејство.
Светата Литургија заврши со многолетствие и божиќна претстава подготвена од веронаучните групи од парохијата „Свети Пророк Илија“ Радово.
