Министерот за социјална политика, демографија и млади, Фатмир Лимани, заедно со заменик-министерот Ѓоко Велковски денеска беа во посета на ЈУ Завод за заштита и рехабилитација Бања Банско.
Тие имаа разговори со штитениците кои престојуваат таму, персоналот и со директорот на установата, Ѓорѓи Пиљафов. Ги слушнаа нивните потреби, проблеми и предлози за унапредување на условите за живот и работа. Директорот Пиљафов ги информираше за моменталната состојба, капацитетите и програмите што се спроведуваат во установата.
Лимани и Велковски порачаа дека вратата на Министерството е секогаш отворена за дијалог и дека политиките ќе се креираат заедно со оние на кои им се наменети.
„Грижата за ранливите категории не е само институционална обврска, тоа е наша морална должност. Бања Банско претставува пример за општество засновано врз човечки вредности, и затоа сме тука, за да слушаме, учиме и преземаме конкретни чекори“ – кажа министерот Лимани.
Заменик-министерот Велковски нагласи дека инклузивноста и достоинството мора да бидат во срцето на секоја социјална политика.
„Ќе се залагаме за подобрување на условите во сите установи низ државата, со реални мерки и континуирана поддршка“ – додаде Велковски.
Во Бања Банско моментално престојуваат 45 корисници на возраст од 19 до 69 години, кои оваа установа ја сметаат за свој дом.
