Маџунков: Профитерско-коруптивниот ГУП ја уништува индустријата во Струмица

Координаторот на советничката група на ВМРО-ДПМНЕ во Советот на општина Струмица, Никола Маџунков со реакција за новиот Генерален урбанистички план на градот Струмица за плански период 2023-2033 година и ги повика граѓаните да присуствуваат на Јавната расправа на 6-ти ноември во Домот на АРМ.

„Профитерско-коруптивниот ГУП ја уништува индустријата во Струмица. Индустриски капацитети купени од група бизнисмени, подржувачи на Костадинов, се пренаменуваат во парцели за изградба на згради.

Откако се уништија сите индустриски капацитети во Струмица, сега на нив ќе се градат згради. На површините на „Монополот“, „Треска“, „Герас Цунев“ се предвидуваат огромен број на згради.

Имотот на групата поддржувачи на Костадинов се вреднува, зголемува и штити, додека имотот на обичниот граѓанин во Струмица, се обезвреднува и уништува.

Со години врз грбот на народот се заработуваат милиони и се бетонира Струмица, додека за обичниот народ останува уништена индустрија, обезвреднет имот, нечисти бетонски населби, немање работни места, иселување.

Без развој на индустрија нема ни работни места за младите во Струмица – Без индустрија им останува да се занимаваат само со кладилници, коцкарници, наркотици и марихуана. Затоа се иселуваат.

СИЛАТА Е ВО НАРОДОТ

Важно е да испланираме убава иднина за младите во Струмица.

Ги повикуваме сите заинтересирани граѓани да присуствуваат на Јавната расправа на 06.11.2023 година (понеделник) во просториите на Дом на АРМ во 11:00 часот“, стои во ракцијата и повикот на советникот Никола Маџунков од ВМРО-ДПМНЕ.