Вчера на големиот христијански празник Богојавление – Водици кога во Македонија во сите градови и села се организира традиционалниот православен обичај – положување на чесниот крст во осветени води, Македонците кои живеат и работат во Холандија за прв пат организираа одбележување на Водици со фаќање на крстот.
Покрај реката во близина на градот Утрехт, голем број Македонци од повеќе региони на Холандија попладнето дојдоа и присуствуваа на осветување на водата во реката и положувањето на крстот од страна на свештеникот Захариј Панов од Македонската Православна општина „Св. Стефан“ во Утрехт.
Најсреќен меѓу четворицата учесници во чинот на фаќањето на крстот беше Роберт Димитроски од Скопје, кој живее во Хилверсон. По завршувањето на овој чин нашинците се собраа на заедничко дружење.
Претходно во црквата „Св. Стефан“ во Утрехт се одржа чествување на празникот Водици со свечена Богојавленска литургија, по што верниците се упатија кон реката.
Струмичанецот Бранко Гошев, кој е еден од иницијаторите за организирање на чинот на положување на светиот крст во водите на реката кај Утрехт, вели дека е среќен што голем број Македонци во Холандија се приклучија на ваквото одбележување на Водици овде, вековна традиција што се негува во Македонија. Радува тоа што меѓу нашинците голем број беа млади луѓе, кои ќе бидат потврда дека оваа прво организирање на фаќањето на крстот ќе прерасне во традиција, да секоја година се собираат од сите краишта на Холандија и на тој начин го чествуваат Водици.
