Вчера во 11:00 часот во Струмица, полициски службеници од СВР Струмица ги лишиле од слобода Б.Д.(24) и С.У.(23), двајцата од Велес. Тие на 25 април околу 09:15 часот биле затекнати при обид да извршат кражба од подрумска просторија од куќа на ул. „Спиро Захов“ во Струмица, при што физички ги нападнале сопственикот З.К. и неговиот сосед Д.Т., по што побегнале од местото.
Двајцата велешани биле задржани во Полициската станица Струмица и во присуство на јавен обвинител од Основното Јавно обвинителство Струмица е извршено препознавање, а во службен разговор признале дека претходно сториле кривично дело „одземање на моторно возило“ на подрачје на Велес.
Исто така, при преземање мерки било констатирано дека Б.Д. бил баран поради бегство од Казнено-поправната установа „Затвор Идризово“. Во текот на денот против лицата ќе биде поднесена соодветна пријава и ќе бидат изведени пред судија од Основен Суд Струмица.
