Лицата со посебни потреби кои живеат на територијата на општина Струмица ќе можат бесплатно да го користат јавниот автобуски превоз. Ваква одлука донесе Советот на општина Струмица на вчерашната седница. Освен тие оваа привилегија ќе можат да ја користат и пожарникарите вработени во ТППЕ Струмица.
Како што не информираше директорот на ЈСП „Струмица Транспорт“, Драги Поп-Стојанов, лицата со посебни потреби до Здружението „Мобилност“ Струмица поднесуваат барање за издавање на картичка со чип со која ќе можат во секое време и за било која релација/линија да го користат бесплатно јавниот автобуски превоз кој сообраќа на територијата на општина Струмица.
Мери Туџарова од Здружението „Мобилност“, иницијатори за можноста на бесплатно користење на јавниот превоз, вели дека оваа услуга можат да ја користат сите приматели на додатокот за попреченост од Министерството за труд и социјална политика, а живеат на територијата на општина Струмица, без разлика дали се членови на „Мобилност“, на некое друго здружение или воопшто не се членови.
Оваа услуга во моментот на користење од страна на лицето за кое е наменета картичката ќе може бесплатно со него да ја користи и неговиот придружник или персонален асистент, кој му помага во секојдневното движење низ градот и населените места.
Вработените во Противпожарната единица на Струмица јавниот превоз бесплатно ќе можат да го користат со приложување на својата пожарникарска легитимација.
