Разиграно и весело беше синоќа во хотелот „Сириус“ во Струмица. Се свиреше, се играа традиционални ора, се пееше… Културно уметничкото друштво „Браќа Минкови“ од Куклиш го славеше големиот јубилеј – 50 години постоење, едно од најстарите друштва во Македонија кое сé уште го негува македонскиот фолклор и обичаите на македонскиот народ.
Благодарници, плакети на голем број соработници и поддржувачи на КУД „Браќа Минкови“ се доделија на синоќешната свеченост. Се промовираше и монографијата – 50 години јубилеј, а „главните“ на друштвото ја пресекоа и големата торта.
КУД „Браќа Минкови“ е симбол за селото Куклиш. Речиси секој жител на Куклиш поминал низ играорната секција, пејачката, но и драмската секција на ова друштво. А еден од некогашните членови на драмската секција е и сега веќе познатиот актер на Македонскиот Народен театар, Борче Начев, кој беше дел од синоќешната свеченост на КУД „Браќа Минкови“.
Ова културно уметничко друштво последните десеттина години работни во лоши услови, откако изгоре Домот на културата во Куклиш каде вежбаа и ги одржуваа пробите. Тоа го прават во импровизирани простории, кои не ги спречија да продолжат и да ја негуваат традицијата со љубов и долгогодишна надеж дека Домот на културата повторно ќе се изгради.
Деновиве од Куклиш, пред опожарениот Дом на културата градоначалникот Костадин Костадинов го најави започнувањето на изградбата на овој Дом, каде членовите на КУД „Браќа Минкови“ повторно ќе добијат своја сцена, да вежбат, но и да ги реализираат сите свои програмски активности пред публиката.
Инаку, за празникот на Струмица, 11 декември ова друштво од општината ја доби Годишната награда „Свети Петнаесет Тивериополски свештеномаченици“.
