Кристина Зимбакова учествува на престижната меѓународна изложба „Етер и моќ“ во рамките на Софискиот фестивал за хартиена уметност, во Националниот дворец на културата во Софија, Бугарија. Изложбата е отворена на 23 мај и ќе трае до 3 јуни 2023 година, а учествуваат избрани 61 автор од 21 земја од светот што создаваат дела со рачно изработена хартија. Кристина е единствената учесничка на овој фестивал од Македонија, а се претставуваат автори од Аргентина, Австрија, Белгија, Бразил, Бугарија, Финска, Франција, Германија, Израел, Јапонија, Канада, Кореа, Мексико, Холандија, Полска, Пуерто Рико, Словенија, Шведска, Турција и Велика Британија.
Карактеристично за опусот на Зимбакова се поетските мотиви и користењето габи за изработка на хартија и создавање мозаик со габи, па така и овојпат учествува со слика во таа техника. Во сликата „Створени за лет“ доминира ендемичниот лишај Usnea аntarctica од островот Крал Џорџ, Антарктик, добиен од проф. Алфредо Пасо, Аргентина, а поетскиот натпис е според истоимена драма од Б.Р. Платнар. Делото симболично го отсликува животниот циклус на пеперутката.
Софискиот фестивал за хартиена уметност е меѓународен, годишен фестивал каде се претставува најдоброто од современите текови во хартиената уметност во светот и двапати е добитник на наградата за европски фестивал, што периодично ја доделува Европската асоцијација на фестивали.
