„Во последниве десеттина дена, Струмица е град со најмало ниво на штетни ПМ10 и ПМ2.5 честички во воздухот, споредено со било кој друг град во Македонија од слична големина и број на население“ – тврди градоначалникот Костадин Костадинов. Тој на прес конференцијата што ја одржа во присуство на претседателот на Советот, Марјан Даскаловски, советничката и неговата заменичка Елена Маѓеровска Паликарова и инспекторката за животна средина, Зорица Партенова, кажа дека спровеле 46 инспекциски надзори на територијата на општина Струмица на локации кои се пријавени како потенцијални загадувачи на амбиенталниот воздух.
„Изготвени се 14 решенија за правни лица со рок за отстранување на утврдени неправилности, 10 решенија за изработка на Елаборати за животна средина, изречени се казни од 9.000 евра за три правни субјекти и по 500 евра казна за одговорните лица во правните субјекти, 9 физички лица се казнети со прекршочни платни налози во висина од 250 евра за согорување на отпад на отворено и за 5 физички лица издадени се писмени опомени“ – кажа градоначалникот Костадинов.
