„И покрај прераната смрт на Гоце Делчев тој останал со своето дело да живее до ден денешен. А ќе живее и за век и векови. Тој беше и тој останува позициониран на највисокиот пиедестал од нашата историја во која цела една плејада родољубци дадоа свој голем и несебичен придонес за денешната слобода, самобитност на нашата македонска татковина. Во името на таа слобода, најсветото нешто по кој тежнее секој човек е револуционерниот поход на Делчев, бил исполнет со помислата дека подобро да се умре на нозе, отколку да се живее на колена. Од таквите негови размислувања, од неговата љубов кон татковината и од непоколебливоста во извршувањето на херојските потфати треба да учиме како во денешни услови да се однесуваме кон татковината и кон сите со кои споделуваме добро, но и зло под оваа наше македонско небо“ – кажа во своето обраќање градоначалникот на општина Струмица, Костадин Костадинов на свеченоста која се одржа на плоштадот „Гоце Делчев“ пред големиот споменик на великанот, а по повод денешниот ден, 153 години од раѓањето на Апостолот на македонското револуционерно движење за ослободување од турското ропство, Гоце Делчев.
Костадинов во својот говор говореше и за животниот пат на Делчев, кој загина млад на 31 година, за неговото семејство, за неговите борби, за неговото убиство на 4 мај 1903 година, но и за неговите активности во Струмица за кои има сведошта, меѓу кои е и стариот споменик во големиот струмички парк, грабнувањето на Назлам Бег, настан кој се случил во 1897 година во кој учествувал и самиот Гоце Делчев.
На свеченоста по повод роденденот на Гоце Делчев, градоначалникот Костадинов, претседателот на Советот на општина Струмица, Марјан Даскаловски и членови на Советот, на Сојузот на борците, претставници на СВР Струмица, од училиштето „Гоце Делчев“ од Вељуса, претставници на политичките партии СДСМ, ВМРО-ДПМНЕ и ЗНАМ, положија свежо цвеќе пред големиот споменик на револуционерот, а рецитал за Гоце читаа ученици од ООУ „Гоце Делчев“ од Вељуса.
