По повод 151 година од раѓањето на Апостолот на македонското револуционерно движење за ослободување од турското ропство, Гоце Делчев, денеска пред споменикот на Гоце на плоштадот во Струмица се одржа свеченост, на која за неговиот живот говореше градоначалникот на општина Струмица, Костадин Костадинов.
Говорејќи за Делчев, Костадинов потенцираше дека денес се почесто сме сведоци на поинаков натпревар меѓу народите, треба да знаеме, во вистинска смисла на зборот, да го почитуваме и негуваме неговото име и дело.
„Со право треба да констатираме дека Гоце не се родил за да биде „монета за поткусурување“, ниту причина за повампирување на политички апетити и територијални претензии. Зарем оној кој го разбираше светот како поле за културен натпревар меѓу народите, заслужува да биде наметнат „камен на сопнување“ и омраза меѓу народите. Вистината за нашето минато и вистината за нашата сегашност нека ни го трасираат патот кон нашата убава иднина. Гоце Делчев, бездруго и во таа иднина ќе го има своето заслужено место во меморијата на нацијата и во меморијата на Македонија“ – кажа во своето обраќање градоначалникот Костадинов.
На свеченоста по повод роденденот на Гоце Делчев, градоначалникот и членови на Советот на општина Струмица, на Сојузот на борците, јавни институции, училишта, здруженија на граѓани и политички партии, положија свежо цвеќе пред големиот споменик на револуционерот, а револуционерна поезија за Гоце читаа членови на Домот за деца и млади „Благој Мучето“ во Струмица. Ученици од основните училишта во општина Струмица пред споменикот поставија изложба на цртежи со ликот на Гоце Делчев.
