![almak](https://strumicanet.com/wp-content/uploads/2023/09/Almak10_2023.jpg")
Кошаркарската ѕвезда од Струмица со интернационална кариера, кој беше дел од македонската кошаркарска репрезентација, Владо Илиевски ја доби Годишната награда за животно дело на Општина Струмица по повод патронот на градот Светите Петнаесет Тивериополски свештеномаченици.
Годишната награда во областа на културата ја доби долгогодишниот спортски хроничар и публицист Иван Станоев, кој годинава ја објави Монографијата „100 години Фудбалски клуб Беласица – столетна фудбалска хроника“, по повод големиот јубилеј на струмичката гордост ФК „Беласица“ – 100 години од основањето на клубот.
Наградата за особен придонес и остварувања во областа на уметноста ја доби ликовниот уметник Марјан Ѕингаров, кој годинава одбележа 30 години од својата уметничка кариера. Годишната награда на Општина Струмица „Свети Петнаесет Тивериополски свештеномаченици“ за 2022 година како признание за посебни остварувања ја доби Фестивалот на камерен театар „Ристо Шишков“, кој годинава го одбележува јубилејот – 30 години од основањето на овој значаен фестивал на кој се слави актерот и неговите достигнувања, а Награда како признание за посебни остварувања во областа на културата доби и КУД „Браќа Минкови“ од Куклиш, кое годинава го одбележува големиот јубилеј – 50 години од основањето на друштвото.
Мирјана Бурназ Кремшовски – солист за музички театар е добитник на Годишната награда за посебни остварување во областа на културата и уметноста, а крводарителот Ѓорги Костов е добитник на Годишната награда за хуманост, како редовен и долгогодишен крводарител со над 70 крводарувања од својата ретка крвна група „Нулта негатив“.
На свеченоста по повод патрониот празник на градот Струмица свое обраќање имаше градоначалникот Костадин Костадинов, потенцирајќи ја улогата на заштитниците Светите Петнаесет Тивериополски свештеномаченици и традицијата во негувањето на нивните дела и љубовта кои ја имале кон Христа.
„Денес кога ни празнуваат душите и срцата во кои подигнавме храмови посветени на свештеномачениците, можеби треба да го слушнеме Божјиот глас кој ни вели да се однесуваме и да дејствуваме согласно правилата за движење по патот кој сме го одбрале. Тоа е патот на човечноста, тоа е патот на добрината, тоа е патот на соработката, тоа е патот на разбирањето, солидарноста, хуманоста, милосрдието и подадената рака. Тој пат не води до кантарот на кој се мерат нештата во животот. На едната страна од кантарот ќе ги препознаеме омразата, зависта, злото, нечовечноста и лагата, а на другата страна љубовта, човечноста во човека, добрината и вистината. И нашиот севишен Господ Бог и Светите Петнаесет Тивериополски свештеномаченици, но и сите ние донро знаеме кои нешта тежат повеќе од другите, кои нешта ни се потребни во животот, а кои се тие коишто треба да ги отфрлиме. Ако сме луѓе да бидеме луѓе во вистинска смисла на зборот, ако сме верници да бидеме верници според начелата на нашата христијанска вера. Ако сме сите Божји чеда, да бидеме послушни за сите негови совети кои секојдневно ни ги дарува тој“ – кажа во своето обраќање гардоначалникот Костадин Костадинов.
По повод празникот на градот, Општина Струмица на денешната свеченост му додели специјално признание за извонредната соработка и континуирана поддршка на Дејвид Гир, евроамбасадор во Македонија.
