По најавата дека македонскиот виртуоз на пијано, Симон Трпчески со музичкиот прокет „Македонисимо“ ќе настапи во родното село на неговата мајка, Секирник, општина Босилово, како дел од второто издание на фестивалот „Босилово – културно лето 2023“, тој во пост на Фејсбук го најави и датумот на одржување на концертот, во сабота, 26 август од 20:00 часот на отворено, а влезот ќе биде слободен.
Концертот беше договорен во месец мај годинава при посетата на Симон Трпчевски со неговата мајка на Општина Босилово и средбата со градоначалникот Ристо Манчев. Тие тогаш заедно беа и во селото Секирник каде го посетија Домот во кој е презентирана носијата на русалиите како заштитен белег на ова населено место.
Симон Трпчески својата прва македонска премиера на „Македонисимо“ ја имаше на сличен ваков начин, минатата година на 27 август, во родното село на неговиот татко, Збажди, општина Струга.
„Македонисимо“ претставува спој на македонската народна музика со џезот и класичната музика, сплет од 23 нумери, најмногу ора и по некоја песна. Музичкиот проект беше создаден во соработка со Трпчески и композиторот Панде Шахов, а го изведува со неговиот бенд составен од Александар Краповски (виолина), Александар Сомов (виолончело), Хидан Мамудов (кларинет, саксофон и кавал) и Влатко Нушев (удиралки).
„Македонисмо“ светската премиера ја имаше во Германија во 2017 година.
