Во понеделник, 5 мај во 20:00 часот во Центарот за култура „Антон Панов“ во Струмица ќе се одржи концерт на Божана Гошева (виолина) и Весна Ангелова Христов (пијано соработник).
На програмата ќе бидат изведени дела на В.А. Моцарт, Allegro, Т. Зографски, Н. Паганини, Ј.С. Бах, Х. Виењавски, П. Сарасате…
Божана Гошева (2006) е родена во семејство на музичари и со музиката е во контакт од најраното детство. Нејзините први музички настапи биле на детски фестивали, каде што настапувала како солист и во хорот на „Златно Славејче“. Во 2010 година почнала да учи виолина во класата на проф. Анна Кондратенко, а потоа и во класата на проф. Румен Димитриев. Понатамошното образование го продолжува во ДМБУЦ „Илија Николовски – Луј“ во класата на проф. Јелена Туфекчиевска, каде што ги поминува сите четири години од средното образование. Во текот на своето школување Божана Гошева има настапувано на многу меѓународни и државни натпревари на кои има освоено високи први и специјални награди. Во 2024 година е добитник на престижната награда на Фондацијата „Илија Николовски-Луј“ за високи достигнувања во текот на школувањето.
Пијанистката Весна Ангелова Христов основно и средно музичко образование го завршува во Скопје, во класата на проф. П. Среброва. На 17-годишна возраст е примена на ФМУ – Скопје, дипломирајќи пијано со највисока оценка, во класата на проф. Б. Романов. Магистрира интерпретација на пијано на ФМУ, под менторство на проф. Р. Кинка (Академија на уметности Нови Сад, Р Србија). Во текот на своето школување е добитник на многубројни државни и меѓународни награди и признанија (Србија, Германија), специјална награда и неколку први награди на државните натпревари по соло пијано и камерна музика. Стипендист е за културно дејствување и културен престој во Париз (2008). Во 2017 во Њујорк, реализира неколку проекти преку Македонскиот културен центар.
