Карневал 2025: Ем ги разрешија, ем ги ставија за почесни членови

Карневалот во Струмица продолжи и денеска на седницата на Советот на општина Струмица. Најавениот предлог на сам ден на карневалот, на 1 март, од страна на градоначалникот Костадин Костадинов за разрешување на членовите на Организациониот одбор на Струмичкиот карневал се најде пред советниците на 49-та седница.

Досегашниот претседател на Организациониот одбор, Александар Цицимов им напиша писмо на советниците, Даскаловски го читаше, градоначалникот Костадинов за наредната седница ќе напишал и тој писмо со свој личен став за Цицимов. Советничката од карневалскиот одбор Елена Достинова си прочита свое писмо за тоа што се случуваше пред изборот за принц и принцеза, за луѓето во одборот, па бараше и извинување од советникот Александар Ненчев за навредите која ги претрпела таа вечер на маскенбалот. Ненчев го предложи Цицимов да биде почесен член на карневалот, па градоначалникот реагираше зошто само тој, нека бидат сите од оборот почесни членови. И така бидна, ги прогласија за почесни членови, досегашните членови на Организациониот одбор, без Ненчев и Достинова, а потоа со 12 гласа „за“ и 5 „воздржани“ ги разрешија сите членови на одборот. Ќе имало јавен оглас и ќе се бирале нови членови на Организациониот одбор. Со тоа заврши циркусот од годинашното издание на Струмичкиот карневал.