Канскиот лауреат „ЧОВЕКОТ КОЈ НЕ МОЖЕШЕ ДА МОЛЧИ“ на програмата на 19-тиот „Астерфест“ во Струмица

„ЧОВЕКОТ КОЈ НЕ МОЖЕШЕ ДА МОЛЧИ“ во режија на Небојша Слијепчевиќ е тринаесетминутен хрватски филм со Горан Богдан во главната улога. Тоа е филм од најновата актуелна хрватска продукција, произведен оваа 2024 година и неодамна тој ја освои Златната палма за краток филм на Канскиот филмски фестивал.

Дејствието на филмот се случува на 27 февруари 1993 година, во Штрпци, Босна и Херцеговина. Патнички воз на линијата Белград – Бар е запрен од паравоени сили во акција на етничко чистење. Додека ги извлекуваат невините цивили, само еден човек од 500 патници се осмелува да им се спротивстави. Ова е вистинска приказна за човекот кој не можел да молчи. Филмот е всушност успешна копродукција помеѓу Хрватска, Словенија и Бугарија. Инаку, филмот е во продукција на „Антиталент“ од Загреб, а зад него стојат имињата на продуцентите Катарина Прпиќ и Даниел Пек.

„Тоа е навистина неверојатно доживување, да се качиш на сцената, и тоа вечерта кога Џорџ Лукас ја прима наградата за животно дело од рацете на Френсис Форд Копола. Сé уште тоа ми изгледа малку нереално. Но она што можеби е најважно е тоа дека оваа награда му ја посветив на Тома Бузов, човекот кој ме инспирираше за овој филм и чијашто е приказната, и многу сум среќен поради тоа, да излезам пред толку голема публика, благодарение на оваа награда“ – изјави пресреќен Небојша Слијепчевиќ во кратката видео изјава за Хрватскиот аудиовизуелен центар, непосредно по добивањето на Златната палма во Кан, што е прво такво високо и престижно признание на Хрватска по осамостојувањето.